رجع الربيع قبل الشتا .... من شعرى الخاص

رجعتلى تانى ضحكتى .... رجعت تنور سكِّتى

رجع الربيع قبل الشتا ... طلق السهام صاب وحدتى

حسسنى تانى بالوجود ... هدم الضلام زال دمعتى

رجع القلم يكتب كلام ... يشع نور .. نور نجمتى

همستلى تانى بصوت حنون ... مش قادرة أخبى لهفتى

حبيبي زور نبع الوصال ... و اشرب هناك من ميّتى

ولقتنى حاضن فرحتى ... وبابوس جدايل مهرتى

وبصوت بيعلى بالأمل ... ماشى باقول أغنيتى

وبنغمة العود و الوتر ... قادر أوصل كلمتى

رجعتلى تانى ضحكتى ... رجعت تنور دنيتى

ياريت تكون من قسمتى

الله يا محمد بجد كلامك جميل و كان وحشنى
يا ريت متحرمناش من كتاباتك و نورت المنتدى

ربنا يخليك يا قمر

و عقبال المليون عضو

بجد كلمات جميلة وكلها أمل وتفؤل وكلمة الربيع بتوحي دايما بالأمل والبهجة.تعبيراتك وتشبيهاتك مالهاش حل زي مثلا

اقتباس :: طلق السهام صاب وحدتى

يعني خلاص الوحدة ماتت واصابها السهم.
وكمان

اقتباس :: حبيبي زور نبع الوصال ... و اشرب هناك من ميّتى

الوصال دايما اللي بينور دنيا الحبيب....ويحس بالراحة بعد التعب وإنه ارتوى بعد عطش الفراق وقسوته.
مهما كتبت مش هقدر اوصف مدى اعجابي بإحساسك وكلماتك.
وفي انتظار المزيد

رائع رائع رائع يا صاحبى

والله زمان

بجد كتاباتك وحشتنى جدا

تسلم إيدك على الكلمات ارقيقه الطبيعيه السلسه

وياريت ما تتأخرش علينا بالجديد

شكرا ليك

وسلام يا صاحبى

» قلب حجر .... من شعرى الخاص